ഞായറാഴ്ച വിശേഷങ്ങള്‍ - കോപ്പേല്‍ മുതല്‍ ചിക്കാഗോ വരെ

കോപ്പേല്‍ ദേവാലയത്തിന്‍റെ കൂദാശാ കര്‍മ്മം ഡിസംബര്‍ 19 ആം തീയതി കാലത്ത് പത്തു മണിക്ക് നടത്തപ്പെടുമെന്നുള്ള ബിഷപ്‌ മാര്‍ അങ്ങാടിയത്തിന്‍റെ പ്രഖ്യാപനം  ഇന്നത്തെ രണ്ട്‌ ദിവ്യബലിക്കും വികാരി ഫാ. വര്‍ഗീസ്‌ നായ്ക്കം പറമ്പില്‍ വായിച്ചു.  വളരെ ലോ കീ ആയിരുന്നു വികാരിയച്ചന്‍റെ അറിയിപ്പ്. കൂദാശ കര്‍മ്മങ്ങളോട് അനുബന്ധിച്ചുള്ള ചടങ്ങുകളെപ്പറ്റി വിശദീകരണങ്ങള്‍ ഒന്നും കൂടുതലായി അദ്ദേഹം തന്നില്ല. എങ്കിലും സ്ത്രീ ധനമായി ഒരു ലക്ഷം ഡോളര്‍ സമാഹരിച്ചു ബാങ്കില്‍ നിക്ഷേപിക്കുന്നതിനെ പറ്റി അദ്ദേഹം ഭക്തജനങ്ങളെ വീണ്ടും ഓര്‍മ്മിപ്പിച്ചു.


കൊച്ചു മടത്തിപ്പറമ്പില്‍ ഹാജരായിരുന്നു. നാട്ടില്‍ പോകുന്ന വര്‍ഗീസച്ചന്  പകരം അദ്ദേഹം ആയിരിക്കും ചാര്‍ജ് വഹിക്കുക.  "ബിഷപ്പിന്‍റെ ആഗ്രഹം നടന്നിരിക്കും" എന്നദ്ദേഹം കുറെ നാള്‍ മുമ്പ്  വെല്ലുവിളിച്ചു പറഞ്ഞത് ഇതാ  യാധാര്ത്യമാകാന്‍ പോകുന്നു. കൂദാശാ കര്‍മ്മം ഡിസംബര്‍ 19 ന് നടത്തുമെന്നുള്ള അറിയിപ്പ് ദിവ്യബലി മദ്ധ്യേ ഉണ്ടായി. അതോടൊപ്പം കോപ്പേല്‍ പള്ളിയെ ഇടവകയായി ഉയര്‍ത്തിക്കൊണ്ടും, ഫ്രിസ്കോ വാര്‍ഡ്‌ നെ  കോപ്പേല്‍ ഇടവകയില്‍ ചെര്‍ത്തുകൊണ്ടും ഉള്ള കല്‍പ്പനകള്‍ ബിഷപ്‌ കൂദാശ  കര്മ്മങ്ങള്‍ക്കിടയില്‍ പുറപ്പെടുവിക്കും എന്ന അറിയിപ്പുകളും ഉണ്ടായിരുന്നു.

കൊച്ചു മടത്തിപ്പറമ്പില്‍ ഇന്ന് നല്ല മൂഡിലായിരുന്നു. എല്ലാവരും സെല്‍ ഫോണ്‍ ഓഫ്‌ ചെയ്യണമെന്നു അദ്ദേഹം അഭ്യര്‍ത്ഥിച്ചു. "നമ്മുടെ പള്ളിയില്‍ അല്ലെങ്കില്‍ തന്നെ "മണി" കളുടെ കളിയാണത്രേ!" ഇപ്പോള്‍ തന്നെയെങ്കിലും മണികള്‍ ആരൊക്കെയാണെന്ന്  അദ്ദേഹത്തിനും ബിഷപ്പിനും ഒക്കെ  മനസ്സിലായിക്കാണും എന്ന് വിശ്വസിക്കുന്നു.


ചിക്കാഗോ: നല്ലതൊന്നും ദീര്‍ഘനാള്‍ നീണ്ടു മുറ്റുകയില്ല! കഴിഞ്ഞ രണ്ട്‌ മൂന്നാഴ്ചയായി നമ്മുടെ കൊയറും ഒന്നരലക്ഷത്തിന്‍റെ സൂപ്പര്‍ സൌണ്ടും സാമാന്യം ഭേദമായി പ്രവര്‍ത്തിച്ചു. ഇന്നാകട്ടെ നേരെ മറിച്ചും. ഒന്നര ലക്ഷത്തിന്‍റെ സൌണ്ട് അതിന്‍റെ മാഹാത്മ്യം മാന്ന്യമായി കൂകി തെളിയിച്ചു എന്ന് പറഞ്ഞാല്‍ മതിയല്ലോ. കുര്‍ബാനയുടെ ആരംഭം തുടങ്ങി സുവിശേഷവായന വരെ അവനങ്ങനെ  ഇടതടവില്ലാതെ  കൂകി ചീറ്റി ക്കൊണ്ടിരുന്നു..  സ്പീക്കറും മൈക്രോഫോണും തമ്മില്‍ തിരിച്ചു പറയാന്‍ അറിയാത്ത പമ്പരവിഡ്ഢികളാണ് മുകളില്‍ കയറിയിരുന്നു മിക്സറില്‍ വലിക്കുകയും തിരിക്കുകയും ചെയ്തു കൊണ്ടിരുന്നത് എന്ന് വ്യക്തമാണ്. നമ്മുടെ പള്ളിയില്‍ sound കാരനാകാന്‍ സൌണ്ട് അറിയണമെന്നില്ല. അച്ഛനെ അറിഞ്ഞാല്‍ മതി.

പാര്‍ക്കിംഗ് ലോട്ടും ഗ്രോട്ടോയും പണിയാനുള്ള ധനശേഖരണാര്‍ത്ധം  ചിത്രാ നൈറ്റ്‌ നടത്തി. ഡോളര്‍ കാല്‍ മില്ല്യന്‍ സംഭരിച്ചു എന്നുള്ള  വീമ്പും  കേട്ടു. പക്ഷെ പാര്‍ക്കിംഗ് ലോട്ടും ഗ്രോട്ടോയും മാത്രം കാണുന്നില്ല.

കൊല്ലം രണ്ടായി ഫോട്ടോ സ്മരണികക്കായി ഫോട്ടോയും കൊടുത്തു മനുഷ്യര്‍ കാത്തിരിക്കുന്നു. ഇതിനിടക്ക്‌ പലരും കാലയവനികക്കുള്ളില്‍ മറഞ്ഞു. മെത്രാന്‍റെ  തലമുടി  ആകെ നരച്ചു. ഈയുള്ളവന്‍റെതു   മുഴുവന്‍ കൊഴിഞ്ഞു. കടുപ്പന്‍ കറുത്ത കളര്‍ തേച്ചു. സെലീന്‍ രണ്ട്‌ പെറ്റു. എന്നിട്ടും സ്മരണിക മാത്രം വന്നില്ല.

പാര്‍ക്കിംഗ് ലോട്ടിനും ഗ്രോട്ടോക്കും  സ്മരണികയുടെ ഗതി തന്നെ വരുമോ എന്നാണ് ഈയുള്ളവന്‍റെ ഭയം.

മലവെള്ളം കയറിയ ഞങ്ങളുടെ പള്ളിയുടെ ബേസ്‌ മെന്‍റ്  ഇപ്പോഴും ഉപയോഗ ശൂന്യം.  അങ്ങോട്ട്‌ ആരെയും കടത്തി വിടാറില്ല. അച്ചന്മാര്‍ അത്‌ സ്വിമ്മിംഗ് പൂള്‍ ആയി മാറ്റിയില്ല എന്ന് വിശ്വസിക്കുന്നു.

ഇന്ന് ചിക്കാഗോ പള്ളിയില്‍ ഞങ്ങള്‍ക്ക് അതിഥികള്‍ ഉണ്ടായിരുന്നു. ന്യൂ ജേര്‍സി, E Milstone പള്ളിയുടെ  നിര്‍മ്മാണ ഫണ്ടിലേക്ക് വേണ്ടി പണം സമാഹരിക്കുവാന്‍ നടത്തുന്ന നറൂക്കെടുപ്പിന്‍റെ ടിക്കെട്ടു വില്‍ക്കുവാന്‍ വന്ന കുറെ യുവാക്കള്‍ . കുറെ നേരം അവരുടെ കണ്മുമ്പില്‍ പെടാതെ മാറിയും മറഞ്ഞും നടന്നു. അവസാനം അവര്‍ വന്നു വളഞ്ഞു. ഒന്നാം സമ്മാനം BMW കാര്‍. ടിക്കെട്ടിനു 100 ഡോളര്‍.

ഓര്‍മ്മ വന്നത് കോപ്പെലിലെ ജേക്കബ്ബിനെയാണ്. അദ്ദേഹത്തിന് കട്ടി കുറഞ്ഞ ശാപമേ കിട്ടിയിരുന്നുള്ളൂ, എങ്കിലും ടൊയോട്ട കാര്‍ അടിച്ചു. പിന്നെ അമാന്തിച്ചില്ല. ടിക്കറ്റ് ഒരെണ്ണം വാങ്ങി. ഈയുള്ളവന് കിട്ടിയിട്ടുള്ള ശാപം വച്ചു നോക്കിയാല്‍ ബെന്‍സ്‌ അടിച്ചില്ലെങ്കിലും  BMW തന്നെയെങ്കിലും  അടിക്കാനുള്ള സാധ്യത കാണുന്നുണ്ട്. 

ടിക്കറ്റ്‌ വില്‍ക്കാന്‍ വന്നവര്‍ക്ക് ശീലയേയും ക്ലാവര്‍ കുരിശിനെയും പറ്റി നല്ല ഒരു  സ്റ്റഡി ക്ലാസും ചിലര്‍ കൊടുത്തു. ക്ലാവര്‍ കുരിശ് തൂക്കിക്കില്ലെന്നു അവരെക്കൊണ്ടു ആണയിടിയിച്ച ശേഷമാണ് ചിലര്‍ ടിക്കറ്റെടുത്തത്.  അവര്‍  തന്ന ഉറപ്പ് മിക്കവാറും അങ്ങാടിയത്തി ന്‍റെഉറപ്പ് പോലിരിക്കും! പാര്‍ക്കലാം !