ഓത്ത് കുര്‍ബാന, അഥവാ, സത്യപ്രതിജ്ഞാ നാടകം

9:30 ന്റെ കുര്‍ബാനയ്ക്ക് എത്താന്‍ അല്പം വൈകിപ്പോയി.

കാരണം മറ്റൊന്നുമല്ല. ഇത്തമ്മയെയും പിള്ളേരെയും പള്ളിയുടെ മുമ്പിലിറക്കിയിട്ടു കിഴക്കേ പാര്‍ക്കിംഗ് ലോട്ട് വഴി കറങ്ങി ചെന്നപ്പോള്‍ ദാ കിടക്കുന്നു നമ്മുടെ കറമ്പന്‍ പോലീസ്. നേരെ പുറകോട്ടടിച്ചു. ഗതി മുട്ടിയപ്പോള്‍ ഞാനൊരു വിദ്യ പ്രയോഗിച്ചു. പഴയ പള്ളിയുടെ പടിഞ്ഞാറെ ഭാഗത്ത് do not enter ല്‍ ക്കൂടി റിവേര്‍സ് അടിച്ചു. വളവു തിരിഞ്ഞു ചെന്നപ്പോള്‍ വേലിയുടെ ഓരം ചേര്‍ന്ന് ചെറിയൊരു ഗാപ് കിട്ടി. വണ്ടി അവിടെ തള്ളി കേറ്റിയിട്ടിട്ട് നേരെ പള്ളിയിലേക്കോടി.

അകത്തു കേറിയപ്പോള്‍ കണ്ട രംഗം കണ്ടു ഞാന്‍ അന്തം വിട്ടുപോയി. മറത്തിപ്പറമ്പിലച്ചന്‍ വളരെ ഔപചാരികപരമായി ആര്‍ക്കൊക്കെയോ സത്യ പ്രതിജ്ഞാവാചകം ചൊല്ലി കൊടുക്കുന്നു. ആദ്യമോര്‍ത്തു ആരുടെയോ കല്യാണമാണെന്ന്. പക്ഷെ നോക്കിയപ്പോള്‍ മണവാട്ടിയെക്കാണാനില്ല. പരിസരബോധം വന്നപ്പോള്‍ കാര്യം മനസ്സിലായി. പുതിയ കമ്മിറ്റിയുടെ സത്യപ്രതിജ്ഞ.

എന്തായിരുന്നു സത്യ പ്രതിജ്ഞ ചടങ്ങിന്റെ ഒരു പ്രൌഡി! തട്ടിച്ചു നോക്കിയാല്‍ പ്രസിഡന്റ് ഒബാമയുടെത് ഒന്നുമല്ലായിരുന്നു!

ഒരു നൂറായിരം കാര്യങ്ങള്‍ ഇവര്‍ ബൈബിളില്‍ കൈവച്ചു സത്യം ചെയ്തു. അച്ഛനെ എല്ലാ ക്കാര്യത്തിലും അനുസരിക്കുമെന്ന് സത്യം ചെയ്തു. പിതാവിനെ അനുസരിക്കുമെന്ന് സത്യം ചെയ്തു. പക്ഷെ അവര്‍ പ്രതിനിധീകരിക്കുന്നു എന്നവകാശപ്പെടുന്ന ഈ ഇടവകക്കാരുടെ താല്‍പ്പര്യങ്ങള്‍ സംരക്ഷിക്കാന്‍ വേണ്ടതെല്ലാം ചെയ്യുമെന്ന് മാത്രം അവര്‍ സത്യം ചെയ്തില്ല.

ഇനി ഇപ്പോള്‍ ഇവര്‍ എന്തൊക്കെ കുന്ത്രാണ്ടങ്ങള്‍ കാട്ടിക്കൂട്ടുമെന്നു ദൈവം തമ്പുരാന് മാത്രം അറിയാം.

തിരിച്ചു വരുമ്പോള്‍ വണ്ടിയില്‍ വച്ചു ഞാനും ഇത്തുവും കൂടി ഒരു കാര്യം ഓര്‍ത്ത് ചിരിച്ച് ചിരിച്ചു മണ്ണ് കപ്പി! മറത്തിപ്പറമ്പിയച്ഛന്റെ നമ്മുടെ പള്ളിയെപ്പറ്റിയുള്ള വര്‍ണന ഓര്‍ത്ത്. ഇദ്ദേഹം PhD ക്ക് വേണ്ടി മുടക്കിയ കാശ് പാഴായിപ്പോയി. ഉറപ്പ്. ഇങ്ങനെ ഇവര്‍ക്കെങ്ങനെ ഇരുട്ടുകൊണ്ട് തുളയടക്കാന്‍ ഉള്ള തൊലിക്കട്ടി കിട്ടി എന്ന് മനസ്സിലാകുന്നില്ല. നമ്മുടെ പള്ളിയകത്ത് കാലെടുത്തു വച്ചിട്ട് ആ അല്താരയിലേയ്ക്ക് നോക്കുന്ന ആരും മൂക്കത്ത് വിരല്‍ വച്ചു പോകും എന്നത് സത്യം. ഈ പൊതുജനങ്ങള്‍ ഇത്ര വിഡ്ഢികളാണെന്നു ഇവര്‍ ശരിക്കും വിശ്വസിക്കുന്നുണ്ടോ. ഈ വെള്ളയുടുപ്പും അണിഞ്ഞു പുരോഹിതവേഷം കെട്ടുന്നത് കൊണ്ടുമാത്രം നിങ്ങള്‍ പുലമ്പുന്ന അര്‍ദ്ധസത്യങ്ങള്‍ ഞങ്ങള്‍ ക്ഷമയോടെ കേട്ടുകൊണ്ടിരിക്കുന്നു. അത്ര തന്നെ.

പുരോഹിതരെ, നിങ്ങള്‍ കേരളത്തിലെ നാല്‍ക്കവലകളില്‍ വെറും വാക് ചാദുര്യം കൊണ്ടും വാചക ക്കസര്‍ത്തു കൊണ്ടും പാവങ്ങളെ പറ്റിച്ചു അവര്‍ക്ക് പാമ്പെണ്ണയും, മയിലെണ്ണയും, സര്‍വരോഗസംഹാരിയും വില്‍ക്കുന്ന തട്ടിപ്പ് വീരന്മാരുടെ നിലയിലേയ്ക്ക് തരം താണിരിക്കുന്നു. നിങ്ങള്‍ പറയുന്ന പുളുവെല്ലാം ഞങ്ങള്‍ കേള്‍ക്കുന്നു. പക്ഷെ അതെല്ലാം ഞങ്ങള്‍ വിശ്വസിക്കുന്നു എന്ന് നിങ്ങള്‍ ശരിക്കും വിശ്വസിക്കുന്നോ? എങ്കില്‍ നിങ്ങള്‍ക്ക് തെറ്റിപ്പോയി. വെള്ളയടിച്ച കുഴിമാടങ്ങള്‍ എന്ന് കര്‍ത്താവ് വിളിച്ചത് നിങ്ങളെ മാത്രം മനസ്സില്‍ കണ്ടുകൊണ്ടാണ്. അതീ ഇടവകയിലെ ഏത് കൊച്ചു കുട്ടികള്‍ക്ക് പോലും അറിയാം.

ഒരു കാര്യം പറയാന്‍ മറന്നു പോയേനെ.
നമ്മുടെ CPA വിദ്വാന്മാര്‍ സകുടുംബം തപസ്സുധ്യാനം കൂടാന്‍ പോയി! മൂന്ന് ദിവസം പച്ചവെള്ളം പോലും കുടിക്കാതെ. (അവര്‍ കിട്ടിയ സമയംകൊണ്ട് ധ്യാനഗുരുവിനെ പിഴപ്പിച്ചില്ല എന്ന് വിശ്വസിക്കുന്നു.) എന്റെ മക്കളെ, ചെറിയോരുപദേശം. നിങ്ങള്‍ ചോവ്വാവൂല്ല. നിങ്ങള്‍ ഇതു പോലെ പത്തു തപസ്സു ധ്യാനം കൂടിയാലും നിങ്ങള്‍ ഈ സമൂഹത്തോട് ചെയ്ത അപരാധത്തിന് പൊറുതി കിട്ടില്ല. വെറുതെ ഭാര്യമാരെ പട്ടിണി ഇടാമെന്നുള്ളതല്ലാതെ യാതൊരു ഫലവും ഇതുകൊണ്ടു നിങ്ങള്‍ക്കിണ്ടാകില്ല. എങ്കിലും ഒരു നല്ല കാര്യം ഞങ്ങള്‍ പറഞ്ഞു തരാം: നിങ്ങള്‍ക്ക് ആണത്വം എന്നൊന്നുണ്ടെങ്കില്‍ കര്‍ത്താവിന്റെ ആ ശിഷ്യനെ കണ്ടു പഠിക്കൂ. യൂദാസിനെ. തൂങ്ങിച്ചാകുന്നതിലും ഒരന്തസ്സുണ്ട്!

വീണ്ടും ഒരു പെരുന്നാള്:
സത്യം പറയാമല്ലോ. ഇതൊരു മനസില്ലാമനസ്സോടെയുള്ള പെരുന്നാളായിരുന്നു. ഒരു ഘൂം ഉണ്ടായിരുന്നില്ല. കഴിഞ്ഞത് അതിരമ്പുഴക്കാര് നടത്തിയെങ്കില്‍ ഇത് എടത്വാക്കാര്‍ നടത്തി. വിട്ടു കൊടുക്കാന്‍ പറ്റില്ലല്ലോ. പിന്നെ ചെണ്ടപ്പുറത്ത് കോല്‍ വയ്ക്കുന്നിടത്തു ഒരു പ്രദിക്ഷണവും കാണുമല്ലോ. മംഗ്ലീഷ് കുര്‍ബാനയ്ക്ക് പള്ളി ഒഴിഞ്ഞു കൊടുക്കുകയും വേണം. അപ്പോള്‍ മേല്‍പ്പറഞ്ഞ പ്രദിക്ഷണം സൂപര്‍. പഴയ പള്ളി കാലിയായി കിടപ്പുമുണ്ട്, ആന്റിമാര്‍ക്ക് സാരി പ്രദര്‍ശനത്തിനൊരു ചാന്‍സുമായി. നേരിയ മഴ ഒരു രസം കൊല്ലിയായിരുന്നുവെന്ന് മാത്രം.

പ്രിയപ്പെട്ട എടത്വാക്കാരെ, ഒരു കാര്യം തുറന്നു പറയുന്നതില്‍ വിരോധം തോന്നരുത്‌. ആ ബിരിയാണി. അത് പോക്ക് സാധനമായിരുന്നു. അറിയും മാംസവും ചേര്‍ത്തുണ്ടാക്കിയ ഒരു ഭക്ഷണം ഇത്രയ്ക്ക് അരുചികരമാക്കണമെങ്കില്‍ അതിന് ഒരു പ്രത്യേക കഴിവ് തന്നെ വേണം. കോഴിയായിരുന്നോ അത്? സാധനമെന്തായാലും അങ്ങോട്ട് ഒന്നു കടിക്കുമ്പോള്‍ റബര്‍ പന്ത് പോലെ ഇങ്ങോട്ട് തിരിച്ചടിക്കും. എല്ലല്ലാതെ അബദ്ധത്തില്‍ പോലും ഒരു ഇറച്ചിക്കഷണം കടിച്ചതായി ഓര്‍ക്കുന്നില്ല. കോഴിയുടെ വേസ്റ്റ് കഷണങ്ങളായിരുന്നു എന്ന് സംശയിക്കുന്നു. എന്തിനീ വഴിപാട്? സത്യം പറഞ്ഞാല്‍ എടത്വായില്‍ നിന്നു പെണ്ണ് കെട്ടാതിരുന്നത്‌ ഈയുള്ളവന്റെ ഭാഗ്യമെന്നു ഇപ്പോള്‍ കരുതുന്നു. ഏടത്വരെ, ഒരു കാര്യം പറയട്ടെ: ഈ സീറോ മലബാറില്‍ വരുന്ന ജനങ്ങള്‍ ഒരു നേരത്തെ ആഹാരത്തിന് വഴിയില്ലാത്തവരല്ല. ഇല്ലെങ്കില്‍ വേണ്ട. ആരും പരാതി പറയില്ല. പക്ഷെ പിച്ചക്കാര്‍ക്കാണെങ്കിലും ഒരു നേരത്തെ ആഹാരം കൊടുക്കുകയാണെങ്കില്‍ നിറഞ്ഞ മനസ്സോടെ, സന്തോഷത്തോടെ, രുചിയോടെ കൊടുക്കുക. വെറും കടത്ത് കഴിക്കുന്ന പോലെ ചെയ്യാതെ. ഒരു സമൂഹത്തിന്റെ സംസ്കാരത്തിന്റെ ഏറ്റവും വലിയ തെളിവാണ് അവരുണ്ടാക്കുന്ന ഭക്ഷണത്തിന്റെ മേന്മ. ഇനി തന്നെയെങ്കിലും ഇതുപോലൊരു പെരുന്നാള്‍ സദ്യ, അഥവാ, സ്നേഹവിരുന്ന് കൂടാന്‍ ഈ ഇടവകക്കാര്‍ക്ക് ഇടയുണ്ടാകാതിരിക്കട്ടെ!