മെത്രാനും കൂട്ടാളികളും കളിക്കുന്നത് നാറുന്ന രാഷ്ട്രീയം

കല്‍ദായവല്‍ക്കരണത്തിന്റെ പേരില്‍ മെത്രാനും കൂട്ടാളികളും അമേരിക്കന്‍ സീറോ മലബാര്‍ ഇടവകകളില്‍ കളിക്കുന്നത് വെറും നാറുന്ന രാഷ്ട്രീയം മാത്രമാണ്.
ചിക്കാഗോയില്‍ മാര്‍ അങ്ങാടിയത്തിന്റെ മേലധ്യക്ഷതയില്‍ ഒരു സീറോ മലബാര്‍ രൂപത ഉണ്ടാകുന്നതുവരെ അസൂയാവഹമായ ഒരുമയിലും സ്നേഹത്തിലും കഴിഞ്ഞിരുന്ന ഒരു സമൂഹമാണ് നമ്മള്‍. മാര്‍ത്തോമ കത്തോലിക്കരായ നമ്മളും, ക്നാനായ കത്തോലിക്കരും, ലത്തീന്‍ കത്തോലിക്കരും, മലങ്കര കത്തോലിക്കരും വരെ ഒരേ കൂടാരത്തില്‍ ആരാധന കര്‍മ്മങ്ങളില്‍ പങ്കുകൊണ്ടിരുന്ന ഒരു കാലമുണ്ടായിരുന്നു. ഇതില്‍ അസൂയ കൊണ്ടിട്ടാകാം ദൈവമോ സാത്താനോ അങ്ങടിയത്തിനെ മെത്രാന്‍ വേഷത്തില്‍ നമ്മുടെ ഇടയിലെയ്ക്കയച്ചത്.

ആദ്യം ചിക്കാഗോയിലും തുടര്‍ന്നു മറ്റ് അമേരിക്കന്‍ നഗരങ്ങളിലും സീറോ മലബാര്‍ സമൂഹങ്ങള്‍ സ്വന്തം ദേവാലയങ്ങള്‍ വാങ്ങാന്‍ തുടങ്ങിയതോടെയാണ് അങ്ങടിയത്തിന്റെ തനി നിറം ആളുകള്‍ കാണാന്‍ തുടങ്ങിയത്. ചൊറിഞ്ഞു ചൊറിഞ്ഞു ചിരങ്ങുണ്ടാക്കുകയെന്നു കാരണവന്മാര്‍ പറഞ്ഞു കേട്ടിട്ടുണ്ട്. ബിഷപ്പ് അങ്ങാടിയത്തിന്റെ പരിഷ്കാരങ്ങളും അവ സമൂഹത്തില്‍ സൃഷ്ടിച്ചിട്ടുള്ള പ്രത്യാഘാതങ്ങളും ഇതിനൊരു മകുടോദാഹരണമാണ്‌.

കേരളത്തിലെ മൂന്നോ നാലോ രൂപതകളില്‍ മാത്രം, അതും അവിടുത്തെ മെത്രാന്‍മാരുടെ പിടിവാശിമൂലം, ഭാഗീകമായി നടപ്പാക്കിയിട്ടുള്ള ഒരു പരിഷ്കാരം കേരളത്തിലെ സര്‍വമാന രൂപതകളിലും നിന്നും വന്നു വസിക്കുന്ന അമേരിക്കന്‍ സീറോ മലാബാര്‍ വിശ്വാസികളുടെ തലയില്‍ ഒന്നടങ്കം അടിച്ചെല്‍പ്പിക്കുന്നതിനു എന്ത് ന്യായമാണ് ബിഷപ്‌ അങ്ങാടിയത്തിനു പറയാനുള്ളത്? ഇത് ചങ്ങനാശ്ശേരിയുടെയോ പാലായുടെയോ കീഴിലുള്ള ഒരു രൂപതയല്ല എന്ന് മനസ്സിലാക്കാനുള്ള വിശാല മനസ്കതയില്ലാത്ത ഒരു വ്യക്തിയാണ് നമ്മുടെ മെത്രാന്‍ എന്ന് ഇതില്‍ നിന്നും ഞങ്ങള്‍ അനുമാനിക്കുന്നതില്‍ തെറ്റുണ്ടോ? എന്നിട്ട് തന്റെ ഈ പരിഷ്കാരങ്ങള്‍ വിശ്വാസികളുടെ സന്മനസ്സിനെ ഒരു പരിധി വരെ ചൂഷണം ചെയ്ത്‌, അവരെ തെറ്റി ധരിപ്പിച്ചു, അവരോടു കള്ളം പറഞ്ഞു, പിന്‍ വാതിലില്‍ ക്കൂടി ആവിഷ്കരിക്കുന്നത് തന്നെ തന്റെ ഈ പരിഷ്കാരങ്ങളുടെ പൊള്ളത്തരമല്ലേ തെളിയിക്കുന്നത്?

ബിഷപ്പിന്റെ "പരിഷ്കാരങ്ങള്‍" എന്ന് മുകളില്‍ പറഞ്ഞത് കൊണ്ട്‌ ഞങ്ങള്‍ ഉദ്ദേശിക്കുന്നത് പുതിയതായി നമ്മള്‍ വാങ്ങുന്ന പള്ളികളില്‍ മാര്‍ തോമ കുരിശും അള്‍ത്താര വിരിയും തൂക്കണമെന്ന അദ്ദേഹത്തിന്റെ ഗൂഡനീക്കങ്ങളെയാണ്. ഞങ്ങളുടെ ഭാഷയില്‍ പരിഷ്കാരങ്ങള്‍, ബിഷപ്പിന്റെയും കൂട്ടരുടെയും ഭാഷയില്‍ ""ആചാരങ്ങള്‍" അല്ലെങ്കില്‍ " പാരമ്പര്യം". അതായത് നമ്മുടെ പഴയ സുറിയാനി, അല്ലെങ്കില്‍ കല്‍ദായ ആചാരങ്ങള്‍, പാരമ്പര്യങ്ങള്‍ എന്നിവ നമ്മുടെ സഭയിലേക്ക് തിരിച്ചു കൊണ്ടുവരുക.

സീറോ മലബാര്‍ സഭയെ പഴയ പേരിലേക്കും പ്രൌഡിയിലേക്കും തിരിച്ചു കൊണ്ടുവരുവാന്‍ മുന്‍ നിരയില്‍ നില്‍ക്കുന്ന ബിഷപ്പിനോടും തന്റെ സഹചാരികളോടും ഞങ്ങളൊന്നു ചോദിച്ചോട്ടെ. നിങ്ങളുടെ കല്‍ദായവല്‍ക്കരണ നീക്കങ്ങളുടെ ആണിക്കല്ലായ രണ്ടു വാക്കുകളാണല്ലോ ആചാരം, പാരമ്പര്യം എന്നിവ. ഈ വാക്കുകളുടെ ശരിയായ അര്‍ത്ഥമെന്ത് എന്ന് ഈ പാവപ്പെട്ട വിശ്വാസികളെ ഒന്ന് പറഞ്ഞു മനസ്സിലാക്കിതരുക.

ബിഷപ്പിനെപ്പോലെ പരിശുധാത്മാവിന്റെ പ്രത്യേക കൃപ കിട്ടാത്തവനാണ് ഈയുള്ളവന്‍ എങ്കിലും സ്ഥൈര്യലേപനത്തില്‍ കൂടി കിട്ടിയ ചുരുങ്ങിയ വെളിവ് വച്ചു പറഞ്ഞാല്‍, "ആചാരം" എന്നാല്‍ കാലങ്ങളോളം "ആചരിച്ച്" വരുന്ന രീതികള്‍, കാര്യങ്ങള്‍, ചിട്ടകള്‍ എന്നെല്ലാം ഞങ്ങള്‍ മനസ്സിലാക്കുന്നു. അതുപോലെ തന്നെ "പാരമ്പര്യം" എന്നാല്‍ പരമ്പരാഗതമായി കിട്ടിയിരിക്കുന്ന ആചാരമര്യാതകള്‍. ഈ വാക്കുകളുടെ ശരിയായ അര്‍ത്ഥം ഇവയെന്നിരിക്കെ ഒരു സുപ്രഭാതത്തില്‍ ഇതാണ് സീറോ മലബാര്‍ സഭയുടെ ആചാരങ്ങള്‍ അല്ലെങ്കില്‍ പാരമ്പര്യം എന്ന് പറഞ്ഞു ചുവന്ന കര്‍ട്ടനും ക്ലാവര്‍ കുരിശും അള്‍ത്താരയില്‍ തൂക്കാന്‍ കൊണ്ടുവന്നാല്‍ അത് കണ്ണുമടച്ചു വിശ്വാസികള്‍ സ്വീകരിക്കണമെന്നാണോ? എവിടെ എങ്കിലും പുതിയ പള്ളി വന്നു കഴിയുമ്പോള്‍ അങ്ങയുടെ തൊപ്പിയില്‍ നിന്നും വലിച്ചു പുറത്തെടുക്കാന്‍ കഴിയുന്ന ഒന്നാണോ ആചാരങ്ങളും പാരമ്പര്യങ്ങളും? കേരളത്തിലെ ബിഷപ്പുമാര്‍ കഴിഞ പല ദശകങ്ങളായി ശ്രമിച്ചിട്ട് പരിഹാരം കാണാന്‍ പറ്റാത്ത് ഈ കല്ടായവല്‍ക്കരണ പ്രശ്നം അനായാസേന പരിഹരിക്കാന്‍ കഴിയ തക്ക എന്ത് പ്രത്യേക ദൈവശാസ്ത്ര-തത്വശാസ്ത്ര-വിദ്യാഭ്യാസ യോഗ്യതയാണ് മാര്‍ അങ്ങാടിയത്തിനുള്ളതെന്നറിയാന്‍ ഈ രൂപതാംഗങ്ങള്‍ ആഗ്രഹിക്കുന്നു. തിണ്ണ മിടുക്കല്ലാതെ എന്ത് ന്യായീകരനമാണ് ഈ ബിഷപ്പിന്റെ ഇത്തരം ഫാസിസ്റ്റ് തോന്ന്യാസത്തിനു ഉള്ളത്? ആയിരക്കണക്കിന് സത്യവിശ്വാസികളുടെ മനസ്സുകളെ വേദനിപ്പിച്ചു അവരുടെ വിശ്വാസത്തെ ചവിട്ടിമെതിച്ച്‌ അങ്ങാടിയത്ത് തന്റെ ചെങ്കോലും കിരീടവും ഉപയോഗിച്ച് നേടുന്ന വിജയം പൊള്ളയായ വിജയം മാത്രമായിരിക്കും. അങ്ങാടിയത്തിന്റെ ഈ യുക്തിയനുസരിച്ച്, നസ്രാണി പെണ്ണുങ്ങള്‍ ഉടുക്കേണ്ടത് ചട്ടയും മുണ്ടുമാണ് എന്നദ്ദേഹം അനുശ്വാസിച്ചാല്‍ അതനുസരിക്കാന്‍ കടപ്പെട്ടവരാകുമോ നമ്മുടെ സ്ത്രീ ജനങ്ങള്‍? നമ്മുടെ കുമാരിമാര്‍ ഡാവിണിയും ഹാഫ് സാരിയും ധരിക്കണമെന്ന് അങ്ങാടിയത്ത് ശറിച്ചാല്‍ അതനുസരിക്കാന്‍ ബാധ്യസ്ഥാരാകുമോ നമ്മുടെ യുവതികള്‍?

ബിഷപ്പ് അങ്ങാടിയത്ത് ആധുനിക സീറോമലബാര്‍ സഭക്ക് ഒരപമാനമാണ്. സഭാസ്നേഹികളും ദൈവഭക്തരും അധ്വാനികളും ആയ അമേരിക്കയിലെ സീറോ മലബാര്‍ വിശ്വാസികള്‍ ഇദ്ദേഹത്തെപ്പോലെ പിന്തിരിപ്പനും പിന്നോക്ക ചിന്താഗതിക്കാരനുമായ ഒരു നിഷ്ഗുണനെ തങ്ങളുടെ ബിഷപ്പായി അര്‍ഹിക്കുന്നില്ല.