തിരുനാള്‍ സമാപിച്ചു

ചിക്കാഗോ സീറോ മലബാര്‍ കത്തീദ്രല്‍ ദേവാലയത്തിലെ വിശുദ്ധ മാര്‍ തോമാ ശ്ലീഹായുടെ തിരുനാളിന് സമാപനമായി. 

ഇന്ന് വൈകിട്ട് നാല് മണിക്ക് ചിക്കാഗോ സീറോ മലബാര്‍ ബിഷപ്‌ മാര്‍ ജേക്കബ് ആങ്ങാടിയത്തിന്റെ മുഖ്യ കാര്‍മ്മികത്ത്വത്തില്‍ അര്‍പ്പിക്കപ്പെട്ട സമൂഹ ബലിയോടെ ചടങ്ങുകള്‍ ആരംഭിച്ചു. സെന്‍റ് ലൂയീസ് രൂപതയില്‍ സേവനം ചെയ്യുന്ന ഫാ. മുണ്ടാടന്‍ വചന പ്രഘോഷണം നടത്തി. നമ്മുട ദേവാലയത്തിന്റെ ചരിത്രത്തില്‍ ആദ്യമായാണ്‌ ലത്തീന്‍ രൂപതയില്‍ ജോലി ചെയ്യുന്നതോ, ലെത്തീന്‍ സന്ന്യാസ സഭയില്‍ പെട്ടതോ ആയ ഒരു പുരോഹിതന് ഇങ്ങനെ ഒരവസരം ലഭിക്കുന്നതെന്നത് ശ്രദ്ധാര്‍ഹമാണ്.
  

പുതിയതായി റി ഡിസൈന്‍ ചെയ്ത അള്‍ത്താര പലരും ആദ്യമായി കാണുന്നത് ഇന്നാണ്. കണ്ണില്‍ കരടു പോലെ ഇക്കാലമത്രയും അല്ത്താരക്ക് മുമ്പില്‍ തൂങ്ങിക്കിടന്ന ചുവന്ന കര്‍ട്ടന്‍ പോയിക്കണ്ടതില്‍   പലരും ആശ്വാസം പ്രകടിപ്പിച്ചു.

ദിവ്യബലിക്ക് ശേഷം ലദീഞ്ഞും, രണ്ടു സെറ്റ് ചെണ്ട മേളങ്ങളുടെ അകമ്പടിയോടെ തെരുവ് ചുറ്റിയുള്ള പ്രദക്ഷിണവും നടന്നു. മുത്തുക്കുടകളും കൊടികളും പിടിച്ചു സ്ത്രീ കളും കുട്ടികളും അടക്കം  നൂറു കണക്കിന് ജനങ്ങള്‍ നിര നിരയായി അണി നിരന്നു. വാളണ്ടിയര്‍മാരുടെ പേട്ടയായിരുന്നു പള്ളിയങ്കണത്തില്‍. മുന്തിയ ഫാഷനില്‍ ഡ്രസ്സ്‌ ചെയ്ത കൊച്ചമ്മമാരും മെഗാ ഫോണുമായി നെട്ടോട്ടം ഓടുന്നുണ്ടായിരുന്നു. എങ്കിലും ഏറ്റവും ഷൈന്‍ ചെയ്യാന്‍ തത്രപ്പെട്ടത്‌ ആണ്ട്രൂസ് തന്നെ എന്ന് സമ്മതിച്ചേ പറ്റൂ.  ഇടവകയിലെ ഓരോ  വാര്‍ഡുകളും അതാതു വാര്‍ഡുകാരുടെ മധ്യസ്ഥ പുണ്ണ്യവാളന്റെ രൂപക്കൂടുമായി പ്രദിക്ഷണത്തില്‍ പങ്കു കൊണ്ടു. പ്രദിക്ഷണ നിരയുടെ ഏറ്റവും പിറകിലായി, പുരോഹിതര്‍ക്ക് തൊട്ടു മുമ്പില്‍ കപ്പലിന്റെ രൂപ സാദ്രിശ്യത്തിലുള്ള ഒരു ഫ്ലോട്ട് ആയിരുന്നു. പാമരം കൊണ്ടും, പായകൊണ്ടും അലങ്കരിച്ചിരുന്ന ഈ കപ്പലിലായിരുന്നു തോമാ ശ്ലീഹായുടെ രൂപക്കൂട്. പള്ളിയങ്കണത്തിലെക്കുള്ള പ്രധാന കവാടത്തില്‍ സ്ഥാപിച്ചിരുന്ന ആര്‍ച്ചിനു താഴെക്കൂടി കപ്പലിന് സുഗമമായി കടന്നു പോകുവാന്‍ പായ്മരത്തിന്റെ പൊക്കം വലിയ ഒരു തടസ്സമായത് പ്രദക്ഷിണം രണ്ടായി മുറിയുവാന്‍ കാരണമായി. 

പ്രദക്ഷിണം മടങ്ങിയെത്തിയതോടെ താഴെ സ്നേഹ വിരുന്നു ആരംഭിച്ചു. ഫ്രൈഡ് റൈസും മട്ടന്‍ കറിയുമായിരുന്നു വിഭവങ്ങള്‍. ഫ്രൈഡ് റൈസിന് എന്തോ പന്തി കേടുണ്ടായിരുന്നു.  മുട്ടന്‍ എല്ലും കഷ്ണങ്ങള്‍ ആയിരുന്നു എങ്കിലും രുചിയുടെ കാര്യത്തില്‍ മട്ടന്‍ സംഗതി കുഴപ്പ മില്ലായിരുന്നു. 

ചടങ്ങുകള്‍ക്ക് വികാരി ഫാ. ആന്റണി തുണ്ടത്തിലും ഫാ. മാത്യു ശാശ്ശെരിയും നേതൃത്ത്വം നല്‍കി. മി. ജോസ് ചാമക്കാലയായിരുന്നു പ്രസുദേന്തി.  

രാത്രി ഒമ്പതരയോടെ ആരംഭിച്ച കരി മരുന്ന് പ്രയോഗം തീര്‍ന്നതോടെ ഇക്കൊല്ലത്തെ തിരുനാള്‍ മംഗളകരമായി സമാപിച്ചു.