പുറത്താക്കപ്പെട്ടവരില്‍ മാണിയും

തിന്ന ചോറിനു നന്ദിയില്ലാത്ത ഫാ ആന്റണി അവസാനം മാണിയെയും പുറത്താക്കി!

ആരാണ് മാണിയെന്നല്ലേ?

വര്‍ഷങ്ങളോളം ചിക്കാഗോ  അരമനയിലും, പള്ളിയിലും നിത്യേന ഭക്ഷണം പാകം ചെയ്തു എത്തിച്ചിരുന്ന മനുഷ്യനാണ് മാണി. എന്താവശ്യത്തിനും, എപ്പോള്‍ വിളിച്ചാലും, നല്ല ചൂടന്‍, നാടന്‍ ഭക്ഷണവുമായി ഓടിയെത്തിയിരുന്ന മാണിയെ കറിവേപ്പിലപോലെയാണ്‌ ഫാ ആന്റണി എടുത്തു ദൂരെ കളഞ്ഞത്. 

നാളിതു വരെ മാണിയുടെ ഭക്ഷണം കഴിക്കാത്ത ആരും നമ്മുടെ അരമനയുടെയോ, പള്ളിയുടെയോ അകത്തളങ്ങള്‍ കണ്ടിട്ടില്ല. ഓരോ വിശേഷ ദിവസങ്ങള്‍ക്കും ശേഷം മിച്ചമുള്ളവ പള്ളി നേതാക്കന്മാരുടെ ഭാര്യമാര്‍ പൊതിഞ്ഞു കെട്ടി വീട്ടില്‍ കൊണ്ടുപോയി ദിവസങ്ങളോളം തിന്നിട്ടുമുണ്ട്. 

മാണിയെ സംബന്ധിച്ചിടത്തോളം അരമനക്കും പള്ളിക്കും ഭക്ഷണം നല്‍കുക എന്നത് ഒരു നേര്ച്ച പോലെയായിരുന്നു. പ്രതിഫലം എന്തെങ്കിലും കിട്ടിയാല്‍ കിട്ടി. ഇല്ലെങ്കില്‍ ഇല്ല. എന്തെങ്കിലും കൊടുത്താല്‍ മേടിച്ചു. 

എന്നാല്‍ ഫാ ആന്റണിക്ക് അതൊന്നും ഒരു പ്രശ്നമായില്ല. മാണി മാറണം. കാരണം? പ്രത്യേകിച്ചോന്നുമില്ല. അച്ചന്‍റെ ഒരു ശിങ്കിടി മി. ചാവടി കാറ്റര്‍ ചെയ്യുന്ന വേറെ ആരുടെയോ പേര് നിര്‍ദ്ദേശിച്ചു. അത്ര തന്നെ. അതോടെ മാണി കൂട്ടാന്‍ചാറുപോലെ തെറിച്ചു. 

ശാപ്പിടുന്നവന്‍ കറിവേപ്പില ഈമ്പി വലിച്ചതിന് ശേഷം പതുക്കെ പാത്രത്തിനരുകില്‍ വയ്ക്കുന്നപോലെ വളരെ നയപരമായി ആണ് ഫാ ആന്റണി  മാണിയെ മാറ്റിയത്. അതിനുള്ള  ആദ്യ നടപടിയായി അച്ഛന്‍ പറഞ്ഞു, ചെലവ് ചുരുക്കലിന്‍റെ ഭാഗമായി ഇനി മുതല്‍ ഫുഡ്‌ പുറത്തു നിന്നും ഓര്‍ഡര്‍ ചെയ്യുന്നതല്ല. ഇന്‍ ഹൌസ് കൂക്കിംഗ് ആണ്. 

അത് കേട്ടതോടെ ജനക്കൂട്ടം ഒന്നാകെ നെറ്റിയില്‍ കുരിശു വരച്ചു, മരിക്കാന്‍ വരെ ആസ്ഥപ്പാട് കൂട്ടി. അത്രയ്ക്കുണ്ട് നമ്മുടെ ഇന്‍ ഹൌസ് കൂക്കുകളുടെ കുക്കിംഗ്. ഏതായാലും ഒന്ന് രണ്ടു ചടങ്ങുകള്‍ക്ക് കുക്കിയതോടെ ഇന്‍ ഹൌസുകാരുടെ കൊതി മാറി. പൊതു ജനങ്ങളുടെ തെറി കേട്ടത് മിച്ചം. 

പിന്നെ മലങ്കരയില്‍ പെട്ട ഒരുത്തനായി ഭക്ഷണം സപ്ലൈ. നാലും അഞ്ചും പേര്‍ക്ക് ഭക്ഷണം ചെയ്തു, ഇരുപതു മൈലോടിച്ചു കൊണ്ട് തരാന്‍ മുതലാകില്ല  എന്ന് പറഞ്ഞു നല്ല നേരത്തെ മലങ്കരക്കാരന്‍ മുങ്ങി. പിന്നെ ഒരാശ്രയം മലബാര്‍ വില്ല്യം ആയിരുന്നു. വളരെ നല്ലൊരു മനുഷ്യനാണ് ഈ വില്ല്യം. ചാവടി കാലു പിടിച്ചു   ഒന്ന് രണ്ടു തവണ അദ്ദേഹം ഫുഡ്‌ കൊണ്ട് പോയി കൊടുത്തു. അച്ചന്മാര്‍ക്കും ബിഷപ്പിനും മലബാര്‍ വില്യത്തിന്റെ  ഭക്ഷണത്തിന്റെ രുചി പിടിച്ചു വന്നപ്പോഴേക്കും അദ്ദേഹവും വലിഞ്ഞു. കാരണം  അച്ചന്മാരെയും ബിഷപ്പിനെയും സുഭിക്ഷം തീറ്റിപ്പോറ്റി ക്കൊള്ളാം എന്ന് അദ്ദേഹത്തിനു നേര്ച്ച  ഒന്നുമില്ലല്ലോ.

ഈ സമയത്താണ് ഫാ. ആന്റണിയുടെ യാത്രയയപ്പ് മാമാങ്കം അരങ്ങേറുന്നത്. മാണിയെ എങ്ങനെ വിളിക്കും? ദിവസേന ഭക്ഷണം കൊണ്ട് പോയി കൊടുക്കില്ല എന്ന് വില്ല്യം പറഞ്ഞു എങ്കിലും യാത്രയയപ്പ് മാമാങ്കത്തിന് അദ്ദേഹത്തിന്‍റെ ഭക്ഷണം തന്നെ ഓര്‍ഡര്‍ ചെയ്തു. 

മാണിയെ മാറ്റിയതിനു ഒഴിവു കഴിവ് പറയാന്‍ വിശ്വസനായമായി ഒന്നും ഫാ. ആന്റണി  കാണുന്നില്ല. അതുകൊണ്ട് പള്ളിയും മാണിയുമായി എന്തോ വലിയ ഒരു അഭിപ്രായ വ്യത്യാസം ഉണ്ടെന്നു വരുത്തി ത്തീര്‍ക്കുകയാണ് അദ്ദേഹം. 

"മാണിയുടെ ബിസിനെസ്സ് ഞാന്‍ പൂട്ടിക്കും" എന്നാണു ഇപ്പോള്‍ നമ്മുടെ എല്ലാം  വളരെ, വളരെ പ്രിയപ്പെട്ട, നല്ലവരില്‍  നല്ലവനായ ആന്റണി യച്ചന്‍ പലരോടും പറഞ്ഞുകൊണ്ടിരിക്കുന്നത്.