തന്ത്രങ്ങള്‍ മെനയുന്ന അരമനവാസികള്‍

കോപ്പേല്‍ ഇടവകാ വിശ്വാസികള്‍ക്കെതിരെ ബിഷപ്‌ അങ്ങാടിയത്ത് നടത്തുന്ന കുരിശ് യുദ്ധത്തിനും, അദ്ദേഹത്തെ  ചെറുത്തു നില്‍ക്കുന്നവര്‍ക്കെതിരെ അദ്ദേഹം അഴിച്ചു വിട്ടിരിക്കുന്ന ആക്രമണങ്ങള്‍ക്കും  ശിക്ഷാ നടപടികള്‍ക്കും എതിരെ ജനങ്ങള്‍  സംഘടിപ്പിച്ചിട്ടുള്ള പ്രാര്‍ത്ഥനാ വിജിലിനുള്ള സമയം അടുക്കുന്തോറും അധമ ശക്തികള്‍ പരിഭ്രാന്തരാകുന്നു.
ഈ പ്രാര്‍ത്ഥനായജ്ഞത്തിനു ഏത് വിധേനയും ഊടുതടസ്സം ഇടാനുള്ള തത്രപ്പാടിലാണ് ഇക്കൂട്ടര്‍. കടുപ്പന്റെ നേതൃത്വത്തില്‍ കുതന്ത്രങ്ങള്‍ നെയ്യുന്ന ഒരു പണിശാലയായി മാറിയിരിക്കുന്നു അരമന.


പ്രസ്തുത വിജിലിന്റെ തിളക്കം കുറക്കാന്‍  മുതു കുരങ്ങനെക്കൊണ്ട്  ചുടുചോറ് വാരിക്കുന്ന പോലെ പാവപ്പെട്ട വര്‍ഗീസച്ചനെ ഉപയോഗിക്കാനാണ്  നമ്മുടെ ലുട്ടാപ്പിയും സംഘവും തീരുമാനിച്ചിരിക്കുന്നത്. . വിജില്‍ പ്ലാന്‍ ചെയ്തിരിക്കുന്ന അതെ സമയത്ത് പള്ളിയില്‍ എന്തെങ്കിലും പരിപാടി  തട്ടിക്കൂട്ടി ജനങ്ങളെ അങ്ങോട്ട്‌ ആകര്‍ഷിക്കാനുള്ള സാധ്യത ഏറെയാണ്‌.

കോപ്പേല്‍ ഇളകി മറിഞ്ഞു കൊണ്ടിരിക്കെ, സീനിയര്‍ മടത്തിപ്പരമ്പില്‍ ഉടന്‍ അവിടെ ലാന്‍ഡ്‌ ചെയ്യുന്നതാണ്. അനുരഞ്ജന ശ്രമമാണ് അദ്ദേഹത്തിന്‍റെ യാത്രോദ്ദേശം എന്ന് പറയപ്പെടുന്നു. വിജില്‍ നടത്താനുദ്ദേശിക്കുന്ന അതെ സമയം തന്നെ അദ്ദേഹം ജനങ്ങളോട്  ദേവാലയത്തില്‍ വച്ചു സംസാരിക്കാന്‍ ആഗ്രഹം പ്രകടിപ്പിക്കാന്‍ സാധ്യതയുണ്ട്. അതല്ലെങ്കില്‍ ഏതെങ്കിലും വാടക വചന ശുശ്രൂഷകനെ വിളിച്ച് ജനങ്ങളോട്  കണ കുണ പറയിപ്പിച്ചു വിജില്‍ പൊളിക്കാന്‍ ശ്രമിച്ചെന്നും വരാം. ഒന്നുമല്ലെങ്കില്‍ അറ്റ കൈ ചെയ്യാനും ഫാ. വര്‍ഗീസ്‌ മടിക്കില്ല. അതായത് ശാപം. മഹാശാപം. വിജിലില്‍ പങ്കെടുത്തു നമ്മുടെ ദേവാലയത്തിന്റെയും ബിഷപ്പിന്റെയും ഖ്യാതി ലോകമെമ്പാടും വ്യാപിപ്പിക്കുന്ന വിശ്വാസികള്‍ക്കും അവരുടെ സന്താന പരമ്പരകള്‍ക്കും ശാപം! കോപ്പെലിലെ ജനങ്ങള്‍ ഇത് കേള്‍ക്കാന്‍ തുടങ്ങിയിട്ട് കാലം കുറെയായി എന്ന് ഫാ. വര്‍ഗീസ്‌ മറന്നു പോയിരിക്കാം.   ഇന്ന് രാത്രി കോപ്പേല്‍ ഇടവകാംഗങ്ങളുടെ വീടുകളിലേക്ക് ഈ-മെയില്‍ സന്ദേശങ്ങളുടെ പ്രവാഹമായിരിക്കുമെന്നും സൂചനയുണ്ട്. ഏത് ചെകുത്താന്റെ കാലു പിടിച്ചും പ്രാത്ഥനാവിജില്‍ പരാജയപ്പെടുത്താനാണ് അവരുടെ ശ്രമം.



ഇതൊന്നും ജനങ്ങളുടെ അടുത്ത്  വിലപ്പോയില്ലെങ്കില്‍ അവസാനത്തെ തുരുപ്പ് ചീട്ടെടുക്കും ഫാ. വര്‍ഗീസ്‌. അതായത് ബിഷപ്‌ പള്ളി അടച്ചു പൂട്ടുമത്രേ! അതായത് ജനങ്ങള്‍ പൈസ കൊടുക്കുക. ബിഷപ്പു എന്തും ചെയ്ത്‌ കൊള്ളട്ടെ. നിങ്ങള്‍ പൈസ കൊടുക്കുക. അല്ലെങ്കില്‍, ദേ, ഞാന്‍ പള്ളി അടച്ചു പൂട്ടും. ഇതാണ് ഫാ. വര്‍ഗീസ്‌  നടത്താന്‍ പോകുന്ന ഭീഷണി.

ഇതുകൊണ്ടും സംഗതി നടന്നില്ലെങ്കില്‍, പിന്നെ അദ്ദേഹം അറ്റ കൈ ചെയ്യും. ഉടുപ്പിന്റെ കീശയില്‍ കയ്യിട്ടു ഗ്ലിസ റിനോ, നല്ല ചുവന്നുള്ളിയോ വലിച്ചെടുത്ത്, ജാല വിദ്യക്കാരനെപ്പോലെ കണ്ണില്‍ തൂത്ത്, ആട്ടിന്‍ പിട കരയുന്ന പോലെ ഒറ്റ കരച്ചിലാണ്.  പെരിയാറ്റിലെ മലവെള്ളം പോലെ ഒഴുകുന്ന ആ ചുടുകണ്ണീരില്‍ വിശ്വാസികളുടെ കടും പിടുത്തം അലിഞ്ഞുപോകും എന്നാണ് അദ്ദേഹത്തിന്‍റെ പ്രതീക്ഷ. 

എന്നാല്‍, പള്ളി പൂട്ടും എന്ന് പറയുന്നത് എന്തു  ഭീഷണി എന്നാണ് ജനങ്ങള്‍ ചോദിക്കുന്നത്. പള്ളി ഇപ്പോള്‍ തന്നെ പൂട്ടുകയാണെങ്കില്‍ പോയ പൈസയല്ലേ പോകൂ, കൂടുതല്‍ പോകില്ലല്ലോ,  എന്നാണ് നമ്മുടെ ഫിജി പോലും ചോദിക്കുന്നത്! പള്ളി അടയ്ക്കും എന്ന് കേട്ടപ്പോളേ  തോമാക്ക് ഉള്ള വട്ടു രണ്ടിരട്ടി  കൂടി. യൂട്ടിലിറ്റി റെജിയും ഭാര്യയും, തൊരപ്പന്‍ സണ്ണിയും, ശീല ഷിബുവും, ആസ്ഥാന ഗായകനും, എന്ന് വേണ്ട ശീലക്കാര്‍ എല്ലാവരും ഈ വാര്‍ത്ത കേട്ടതോടെ ആകെ പരിഭ്രാന്തിയിലാണ്. കാരണം ഈ പള്ളിയില്‍ എന്തെങ്കിലും അധികാരസ്ഥാനം വഹിച്ചു വിലസാമല്ലോ  എന്ന ഒറ്റ മോഹത്താലാണ് അവര്‍ സഭയേയും സമുദായത്തെയും ഒറ്റിക്കൊടുത്ത്, സത്യവിശ്വാസവും ഉപേക്ഷിച്ച്, ശീലയും മുറുക്കി  കെട്ടി, അങ്ങാടിയുടെ കൂടെ ഇറങ്ങിത്തിരിച്ചത്. പള്ളി പൂട്ടിയാല്‍ ചവിട്ടിയതുമില്ല, പിടിച്ചതുമില്ലഎന്ന ഗതിയാണ് അവര്‍ക്ക് വരാന്‍ പോകുന്നത് . ഇക്കാരണം കൊണ്ടു തന്നെ പള്ളി പൂട്ടുന്നതിന് ഇവര്‍ കൂട്ട് നില്‍ക്കില്ല, എന്ന് മാത്രമല്ല , അങ്ങനെയൊരു സാഹചര്യം വന്നാല്‍, സര്‍വ അഭിപ്രായ ഭിന്നതകളും മറന്നു, ശീല വിരുദ്ധരുടെ കൂടെ കൈകോര്‍ത്ത് ഒറ്റക്കെട്ടായി നിന്നു,  ബിഷപ്പിന്‍റെ നയങ്ങള്‍ക്കെതിരെ യുദ്ധം ചെയ്യാനും അവര്‍ തയ്യാറാണ്.

സംഗതികള്‍ ഇങ്ങനെ അടിക്കടി പുരോഗമിക്കുന്നതനുസരിച്ചു ബിഷപ്പു തന്‍റെ തല തിരിഞ്ഞ ശിക്ഷാ നടപടികളും തുടരുകയാണ്. പൊതുയോഗത്തില്‍ അച്ഛനോട്  ഒരു ചോദ്യം ചോദിച്ചു എന്ന കുറ്റമാരോപിച്ചു CCD അദ്ധ്യാപകന്‍  ജിജുവിനെ തല്‍സ്ഥാനത്തു  നിന്നും പിരിച്ചു വിട്ടതായി അദ്ദേഹത്തിന് അറിയിപ്പ് കിട്ടി. CCD co -ordinator ന്‍റെ തല  ത്രാസില്‍ അങ്ങോട്ടും ഇങ്ങോട്ടും, ഇപ്പോള്‍ തെറിക്കും, ഇപ്പോള്‍ തെറിക്കും എന്ന മട്ടില്‍  ആടിക്കൊണ്ടിരിക്കുകയാണ്. അതുപോലെ തന്നെ മറ്റ് CCD അധ്യാപകരുടേയും. സംഗതികള്‍ ഇങ്ങനെ പോയാല്‍ യേശുവിനെയും, പരിശുദ്ധ മാതാവിനെയും, ക്രൂശിതനായ ദിവ്യനാധനെയും പറ്റി കുഞ്ഞുങ്ങളെ പഠിപ്പിക്കുന്ന ഏതൊരു CCD അദ്ധ്യാപകന്റെയും തല തെറിക്കും എന്ന് ഉറപ്പാണ്.

വട്ടന്‍ തോമയും റെജിയും കൂട്ടരും കൂടി  ഫാ. വര്‍ഗീസിനെ വലിയൊരു കുടുക്കില്‍ അകപ്പെടുത്തിയിരിക്കയാണ്. . ഇവരും  ശേഷ്ട ഇടയനും ഒത്തു ചേര്‍ന്ന് ഒരു വശത്തും, മറുവശത്ത്‌   കുഞ്ഞാടുകളും നിന്ന്‌ പരസ്പരം വാശിയോടെ വലിക്കുന്ന  വടം വലിയുടെ ഇടയ്ക്കു കിടന്നു നടുവില നട്ടം തിരിയുന്നത് ഫാ. വര്‍ഗീസാണ്. അദ്ദേഹത്തിന് അരമനയില്‍ നിന്നും കിട്ടുന്ന സമ്മര്‍ദം എത്ര നാള്‍ അദ്ദേഹത്തിന് താങ്ങാന്‍ പറ്റുമോ എന്തോ. ഇനി നാട്ടിലേക്കു പോയാല്‍ തിരിച്ചില്ല എന്ന് അദ്ദേഹം പലരോടും സൂചിപ്പിച്ചിട്ടുണ്ട്. ഇക്കണക്കിന് സംഗതികള്‍ അധികം മുമ്പോട്ട്‌ പോയാല്‍ "ഞാന്‍ അങ്കമാലിയില്‍ നിന്നും കള്ളവണ്ടി കയറി, കൊയമ്പത്തൂര്‍ക്ക് പുറപ്പെട്ടു പോകും. അവിടെ വല്ല തമിഴന്റെയും ചായക്കടയില്‍ പണിയെടുത്തു ശിഷ്ടകാലം കഴിച്ചു കൂട്ടും. ഇങ്ങനെ ജീവിക്കുന്നതിലും ഭേദം അതാണ്‌, " എന്ന് പറഞ്ഞു അദ്ദേഹം ബിഷപ്പിനെ പല തവണ ഭീഷണിപ്പെടുത്തി അത്രേ.

ഇത് കേട്ടു ലുട്ടാപ്പി തുള്ളിച്ചാടി. അങ്ങനെയെങ്കില്‍ അതിന്‍റെ ഉത്തര വാദിത്ത്വവും  കോപ്പെലിലെ കുഞ്ഞാടുകളുടെ തലയില്‍ വച്ചു കെട്ടാമല്ലോ എന്നാണ് അദ്ദേഹത്തിന്‍റെ ചിന്ത.