ഗാര്‍ലാന്ഡ് ആകെ കുട്ടിച്ചോറായി

ഗാര്ലാണ്ടില്‍ ഇന്ന് കൂടിയ രണ്ടാം പൊതുയോഗം തീരുമാനമൊന്നുമാകാതെ  അലമ്പിപ്പിരിഞ്ഞു. കഴിഞ്ഞ പൊതുയോഗത്തില്‍ കൈക്കൊണ്ട തീരുമാനങ്ങള്‍ ചവറ്റു കൊട്ടയില്‍ എറിഞ്ഞുകൊണ്ട് പുതിയ ചില ക്ലാവര്‍ കുരിശു വകുപ്പുകളുമായാണ് ഫാ. ജോജി ഇന്ന്  രംഗത്ത് വന്നത്.  

പുതിയ പള്ളിയുടെ അല്ത്താരയില്‍ സ്ഥാപിക്കാനുള്ള ചിത്രത്തിന്‍റെ നക്കല്‍ രൂപം അച്ഛന്‍ ജനങ്ങള്‍ക്ക്‌ മുമ്പില്‍ പ്രദര്‍ശിപ്പിച്ചതോടെ നൂറു കണക്കിന് ജനങ്ങള്‍ അദ്ദേഹത്തിനെതിരായി  മുദ്രാവാക്യങ്ങളും മുഴക്കി സദസ്സിലിറങ്ങി. തങ്ങളുടെ അല്ത്താരയില്‍ ക്രൂശിത രൂപം മാത്രം മതി എന്ന് ഒറ്റക്കെട്ടായി മുദ്രാവാക്യങ്ങള്‍ മുഴങ്ങിയതോടെ ഫാ. ജോജിയുടെ അടപ്പ് തെറിച്ചു എന്ന് പറഞ്ഞാല്‍ മതിയല്ലോ. സമാധാനം പുനസ്ഥാപിക്കാന്‍ കഴിയില്ല എന്ന് ഉറപ്പു വന്നതോടെ, ഇതോടെ പൊതുയോഗം അവസാനിച്ചിരിക്കുന്നു എന്ന് വിളിച്ചു പറഞ്ഞിട്ട് അദ്ദേഹം സ്വന്തം തടി രക്ഷിച്ചു സ്റ്റാന്റ് വിട്ടു. 

ലോകത്തില്‍ ഒരു സീറോ മലബാര്‍ പള്ളിയുടെ ചരിത്രത്തിലും ഇന്നുവരെ നടക്കാത്ത ഒരു സംഭവമാണ് ഇന്നിവിടെ നടന്നത്.. വെളുക്കാന്‍ തേച്ചത് പാണ്ടായി എന്ന് പറഞ്ഞ പോലെ, ഇപ്പോള്‍ വന്നപ്പോള്‍ ക്ലാവര്‍ കുരിശിനെ അനുകൂലിച്ചു ഒരുത്തനും ഇല്ല എന്ന ഗതി വന്നിരിക്കുകയാണ്. സധൈര്യം,  സുശക്തമായി ക്രൂസിഫിക്സിനു വേണ്ടി സിന്ദാബ വിളിച്ച വന്‍ ജനാവലിക്കുമുമ്പില്‍ ഉള്ള ക്ലാവര്‍ രോഗികളുടെ ധൈര്യവും ചോര്‍ന്നുപോയി.

കൃത്യം ഒരു വര്‍ഷം മുമ്പ് കൊപ്പെലില്‍ നടന്ന അതെ അത്ഭുതം തന്നെയാണ്  ഇന്ന് ഗാര്‍ലാണ്ടിലും  നടന്നത്. അന്ന് വട്ടായിലച്ചന്റെ ധ്യാനത്തിന്റെ മികവില്‍ പരിശുധാത്മാവിനാല്‍ പ്രചോതിതരായ ഒരു കൂട്ടം ചെറുപ്പക്കാര്‍ കൊപ്പെലില്‍ കര്‍ത്താവിന്റെ ക്രൂശിത രൂപം എന്നന്നേക്കുമായി സ്ഥാപിച്ചു. അവിശ്വാസികളെ അവിടുന്ന് ചിതറിച്ചു, പരാജയപ്പെടുത്തി.

ഇന്ന് ഗാര്ലാണ്ടില്‍ നടന്നതും മറ്റൊന്നല്ല. ഈ ഓശാന ഞായറാഴ്ചയും വട്ടായിലച്ചന്റെ ധ്യാനത്തില്‍ നിന്നും പരിശുധാത്മാവിന്റെ നിറവു അവിടുത്തെ ജനങ്ങളിലേയ്ക്ക് ഇറങ്ങി. ആ ശക്തി അവരില്‍ പ്രവര്‍ത്തിച്ചു. ഇരുന്നൂറ്റി അമ്പതിലധികം ജനങ്ങള്‍ അമാനുഷീകമായ ആവേശത്തോടെ ക്രൂശിതനായ യേശുനാഥന് വേണ്ടി ശക്തിപൂര്‍വം ശബ്ദ മുയര്‍ത്തി. ഇതിന്റെ പിന്നില്‍ പ്രവര്‍ത്തിച്ചത് പരിശുതാത്മാവ് മാത്രമാണ് എന്ന് എടുത്തു പറയേണ്ടിയിരിക്കുന്നു.

കൊപ്പെലില്‍ ജനങ്ങള്‍ കഴിഞ്ഞ ഒശാനക്ക് ഇളകി. ഈ ഒശാനക്ക്  ഗാര്‍ ലാന്‍ഡില്‍ ജനങ്ങള്‍ ഇളകി. ചിക്കാഗോയും മറ്റു പല ഇടവകകളും ഏതു സമയവും പൊട്ടിത്തെറിക്കാം എന്ന വിധത്തില്‍ നീറിപ്പുകഞ്ഞു കൊണ്ടിരിക്കുന്നു. എന്നിട്ടും റോമാ നഗരം  കത്തി ചാമ്പലായി  കൊണ്ടിരുന്നപ്പോള്‍ കിന്നാരം മീട്ടിക്കൊണ്ടിരുന്ന നീറോ ചക്രവര്‍ത്തിയെപ്പോലെ ബിഷപ്‌ അങ്ങാടിയത്ത് ഏതോ ഒരു മൂഡസ്വര്‍ഗത്തില്‍ വിരാജിക്കുന്നു.

ഇന്ന് ഗാര്ലാണ്ട് പള്ളിയില്‍  അരങ്ങേറിയ ഈ പൊതുയോഗ "പ്രകടന"ത്തിന്റെ ഓഡിയോയും വിഡിയോയും ഞങ്ങളുടെ കൈവശം എത്തിക്കഴിഞ്ഞു. ഓഡിയോ താമസം വിനാ ഞങ്ങള്‍ ഈ സൈറ്റില്‍ ഇടുന്നതാണ്.  എഡിറ്റിംഗ് ഉം മറ്റു പണികളും കഴിഞ്ഞാല്‍ ഉടനെ വീഡിയോയും ഞങ്ങള്‍ പുറത്തിറക്കുന്നതാണ്. 

വിഡിയോയും ഓഡിയോയും പുറത്തായിട്ടുണ്ട് എന്നറിഞ്ഞ ഫാ. ജോജി മരണ  വിഭ്രാന്തിയിലാണ്. വിഡിയോ കോപി കൈക്കലാക്കുവാന്‍ അതെടുത്ത പയ്യന്‍സിനെ ഭീഷണി വരെ പെടുത്തുകയാണ് അച്ഛനും സില്‍ബന്ധികളും. സെല്‍ ഫോണ്‍ കയ്യിലുള്ള ആര്‍ക്കും വിഡിയോ പിടിക്കാം എന്ന സത്യം ഇതുവരെ ഫാ. ജോജിക്ക് മനസ്സിലായിട്ടില്ല എന്ന് തോന്നുന്നു.